पोखरा ।
आगामी ३ फागुनमा देशकै पर्यटकीय राजधानी पोखरा भ्रमण वर्ष घोषणा गरिने भएको छ । पोखरामा आयोजित छलफल कार्यक्रममा अगामी ३ फागुनमा विधिवत रुपमा पोखरा भ्रमण वर्ष २०२५ घोषणा गर्न लागिएको पोखरा महानगरका प्रमुख धनराज आचार्यले जानकारी दिए । पोखरा भ्रमण वर्ष सफल पार्न आयोजित मुल समारोह बैठकलाई सम्बोधन गर्दै प्रमुख आचार्यले आगामी ३ फागुन अर्थात १५फेब्रुअरीको दिन विहान ११ बजे नेपाल सरकारका उच्च पदस्त ब्याक्तिहरुको उपस्थितीमा पोखरा भ्रमण वर्षको शुभारम्भ गरिने बताए ।
भ्रमण वर्ष सफल बनाउनका लागि प्रमुख आचार्यको नेतृत्वमा एक हजार सदस्यीय मुल समारोह समिति निर्माण गरिएको छ । आचार्यकै नेतृत्वमा निर्देशक समिति र पर्यटन क्षेत्रबाट प्रतिनिधित्व हुने गरी कार्यसम्पादन समिती गठन गरिएको प्रमुख आचार्यले जानकारी दिए । त्यसैगरी मुल समारोह समितिमा महानगर भित्रका राजनीतिक दलका प्रमुख र वडा अध्यक्षहरु, सल्लाहकार समितिमा पोखरा महानगर परिषद, कास्कीका चार वटै सुरक्षा निकाय र राजनीतिक दलका प्रतिनिधीहरु छन ।
पोखरा उद्योग वाणिज्य संघ र लेखनाथ उद्योग वाणिज्य संघले पोखरालाई प्रतिनिधित्व हुने गरी कोशेली घरको निर्माणको तयारी समेत भइरहेको उनको भनाइ थियो । पर्यटन क्षेत्रका उद्योगहरुले समेत विभिन्न प्याकेजको तयारी गरिरहेको उनको भनाइ थियो । हवाई र बस सञ्चालक कम्पनीहरुसंग समेत सहकार्य गरी प्याकेजको ब्यवस्था मिलाउने प्रमुख आचार्यले बताए ।
उनका अनुसार कास्की आदर्श समाज, एनआरएनए र बाहिर रहेका संघसंस्थाका प्रतिनिधीहरुलाई सद्भावना दुत घोषणा गरिने छ । विदेश विभागसंग सहकार्य गरेर अगाडि वढ्ने,देश र विदेशमा प्रचार प्रसारलाई जोड दिने र पोखरा क्षेत्रमा रहेको पर्यटकीय गन्तब्य समेट्दै पुस्तक प्रकाशन गर्ने अनि त्यसमा पनि क्युआर कोडको ब्यवस्था समेत गर्नेे उनले जानकारी दिए ।
पोखरा महानगर र गण्डकी प्रदेश सरकारको संयुक्त आयोजनामा उक्त कार्यक्रमको आयोजना हुने र उक्त कार्यक्रम पूर्व पोखराको ३३ वटै वडाको प्रतिनिधित्व हुने गरी झांकी तथा ¥यालीको आयोजना हुनेछ । भने पर्यटनको क्षेत्रबाट एक वटा ब्यानर सहित झांकी तथा र्यालीको आयोजना गरिने छ । भ्रमण वर्ष सफल बनाउनका लागि विभिन्न देशका राजदुतहरुको समेत सहभागी रहने महानगर प्रमुख मेयर आचार्यले जानकारी दिए ।
सो अवसरमा वोल्दै पोखरा पर्यटन परिषदका अध्यक्ष तारानाथ पहारीले पोखरा भ्रमण वर्षले पर्यटनको क्षेत्रमा राम्रो हुने वताउदै त्यसलाई सफल बनाउनका लागि पर्यटन संग सम्बद्ध संघ संस्थाहरुले सहकार्य गरेर अगाडी बढ्ने बताए ।
त्यस्तै टान पोखराका अध्यक्ष कृष्ण आचार्यले पोखरा भ्रमण वर्षको अवसरमा पोखरा क्षेत्रमा सञ्चालन हुने ट्रेकिङको गतिविधीमा २५ प्रतिशतसम्म छुट दिने र उक्त छुट एक वर्षसम्म कायम रहने बताए ।
होटल संघ पोखराका अध्यक्ष लक्ष्मण सुवेदीले भ्रमण वर्षभरी पोखरामा सञ्चालित होटलमा २० प्रतिशत छुट दिने जानकारी दिए ।
