काठमाडौं ।
नेपाली कांग्रेसका कार्यवाहक सभापति पूर्णबहादुर खड्काका साथै महामनत्रीद्वय गगन थापा र विश्वप्रकाश शर्माले पार्टीको क्रियाशील सदस्यता नवीकरण र वितरणको सम्बन्धमा जिल्ला सभापतिहरूसँग भर्चुअल संवाद गर्ने भएका छन् ।
बुधबार बिहान ८ बजेदेखि ७७ वटै जिल्ला सभापतिसँग महाधिवेशनका सन्दर्भमा कार्यवाहक सभापति खड्का र महामन्त्रीद्वय थापा र शर्माले भर्चुअल संवाद गर्ने पार्टी केन्द्रीय कार्यालयका मुख्यसचिव कृष्णप्रसाद पौडेलले जानकारी दिए ।
‘महाधिवेशनका सन्दर्भमा कार्यवाहक सभापति र महमन्त्रीहरूले जिल्ला सभापतिहरूसँग भर्चुअल संवाद गर्दै हुनुहुन्छ,’ मुख्यसचिव पौडेलले भने, ‘भोलि बिहान ८ बजेबाट सुरु हुन्छ ।’
छलफलमा क्रियाशील सदस्यता नवीकरण र नयाँ वितरणबारे कुराकानी हुनेछ । त्यस्तै प्रतिनिधिसभा र राष्ट्रियसभा निर्वाचनका लागि उम्मेदवार सिफारिसबारे पनि कुराकानी हुनेछ ।
१५औँ महाधिवेशन पुस २६ देखि २८ गतेसम्म गर्ने कार्यतालिका केन्द्रीय कार्यसमिति बैठकले सर्वसम्मत पारित गरेको कांग्रेसमा कार्यतालिका मिचिने क्रम सुरु भइसकेको छ ।
