सौर्य एयरलाइन्स नाइनएन—एमइ, सिआरजे २०० वायुयान दुर्घटनामा तीन सन्तति गुमाएका प्रकाश खतिवडाले वायुयान दुर्घटना जाँचबुझको प्रतिवेदनमाथि असन्तुष्टि व्यक्त गरेका छन् ।
प्रतिनिधि सभाअन्तर्गतको अन्तर्राष्ट्रिय सम्बन्ध र पर्यटन समितिको बैठकमा बिहीबार प्रतिवेदनमाथि छलफल भएको हो । छलफलमा नेपालको १०९ वटा विमान दुर्घटनाको इतिहासमा सौर्य जहाजको दुर्घटना छुट्टै खालको भएको खतिवडाले बताए । उनले ह्युमन फ्याक्टरका कारण दुर्घटना भएको निष्कर्ष देखाइएकोमा सहमति जनाए ।
उनले सौर्य एयरलाइन्स, एरोड्रोन र नेविगेसनको कुरा प्रतिवेदनमा गरिएको तर क्यानलाई सेवा प्रदायक भनेर उल्लेख नगरिएकोप्रति आपत्ति जनाए । सेवा प्रदायक संस्थाको अनुमति दिने व्यक्ति जाँचबुझ समितिका संयोजक रतिशचन्द्रलाल सुमनको आफन्त भएकाले त्यो नखुलाइएको उनको आरोप छ ।
उक्त उडान, यात्रुहरू र एयरलाइन्स कम्पनीको हर्कत पनि अवैधानिक रहेको खतिवडाको भनाइ छ । ४ वर्षको नातिलाई किन सौर्य एयरलाइन्सको कर्मचारी बनाइयो रु भन्दै उनले प्रश्न गरे । ऊर्जा मन्त्रालयमा कार्यरत आफ्नी छोरीलाई समेत सौर्य एयरलाइन्सको कर्मचारी बनाएर उडाइएको उनले बताए ।
सरकारले छानबिनका लागि बनाएको जाँचबुझ आयोग समेत अवैधानिक रहेको बताए । प्रतिवेदन बनाउँदा अरूसँग अन्तर्वार्ता लिएको उल्लेख गरेपनि तीन सन्तति गुमाएको परिवारसँग कुनै सोधपुछ नगरिएको उनको भनाइ छ । प्रतिवेदनसमेत नियोजित रहेको उनको ठहर छ । पीडितका कुरा सुनियो भनेपनि न्याय पाएको अनुभूति हुने उनको भनाइ छ ।
उनले न्यायिक जाँच आयोग बनाएर अनुसन्धान गर्न माग गरे । न्याय र क्षतिपूर्तिको सुनिश्चित गर्न पनि जाँच आयोगको आवश्यक रहेको उनले बताए । तथ्य र प्रमाणले सौर्य जहाज दुर्घटना मात्रै नभएको स्पष्ट हुने उनको जिकिर छ । २०८१ को साउन ९ गते त्रिभुवन अन्तर्राष्ट्रिय विमानस्थलमा सौर्य एयरलाइन्सको जहाज दुर्घटना भएको थियो । जहाँ १८ जनाको ज्यान गएको थियो । दुर्घटनामा खतिवडाका ज्वाइँ, छोरी र नातिको निधन भएको थियो ।
