पोखरा ।
राष्ट्रिय स्वतन्त्र पार्टीका सभापति रवि लामिछानेको जिल्ला अदालतमा कास्कीमा म्याद थपका लागि बहस सकिएको छ । सहकारी ठगी, संगठित अपराध र सम्पत्ति सुद्धीकरणसम्बन्धी कसुरमा अनुसन्धानका लागि हिरासतमा रहेका लामिछानेलाई यसअघिको म्याद सकिएपछि आज म्याद थपका लागि अदालत उपस्थित गराइएको थियो ।
न्यायाधीश नवराज दाहालको इजलासमा पीडितहरुको तर्फबाट कृष्णप्रसाद जैसी र रवि लामिछानेले बोलेका थिए । लामिछानेले आफूमाथि राजनीतिक प्रतिशोध साधेको र रकम हिनामिनामा आफ्नो कुनै संलग्नता नरहेको दोहोर्याएका छन्। उनले सहकारी पीडितहरुको आन्दोलन नक्कली भएको भन्दै केही व्यक्तिको स्वार्थमा आफूविरुद्ध आन्दोलन गरेको आरोप समेत लगाए ।
आजको बहसमा रविको तर्फ वरिष्ठ अधिवक्ता सुशील पन्त, मेघराज पोख्रेल, नारायण घिमिरेले बहस गरेका थिए। एउटै मुद्दामा पक्राउ परेका पूर्व डीआईजी छविलाल जोशीका तर्फबाट वरिष्ठ अधिवक्ता जगनाथ ढकाल र कृष्ण बहादुर थापाले बहस गरेका थिए ।
यसैगरी, जिल्ला सरकारी वकिल कार्यालयका न्यायाधिवक्ता कमला काफ्ले, सहायक जिल्ला न्यायाधिवक्ता शान्तिदेवी शर्मा र विपिनराज तिवारी र सहकारी पीडितका तर्फबाट अधिवक्ता युवराज पराजुली र वीवी विष्टले बहस गरेका थिए ।
रास्वपाको पार्टी कार्यालय काठमाडौंबाट कात्तिक २ गते पक्राउ परेका लामिछानेमाथि सम्पत्ति शुद्धीकरण र सहकारीको रकम अपचलनमा प्रहरीले एक साथ अनुसन्धान गरिरहेको छ ।
