नवलपरासी ।
देउसी भैलो खेल्ने समुह बोकेको गाडी दुर्घटना हुँदा १० जना घाइते भएका छन । पश्चिम नवलपरासीको सुस्तामा देउसी भैलो खेल्ने समूह बोकेको गाडी दुर्घटनामा परेको हो । आज साँझ सुस्ता गाउँपालिका वडा नम्बर ३ बिगेपस्थित भित्री सडक खण्डमा लु ३ च ६०३२ नम्बरको पिकअप गाडी दुर्घटना भएको प्रहरीले जनाएको छ ।

देउसी भैलो टोली बोकेर हिँडेको पिकअप गाडीले बाख्रालाई जोगाउने क्रममा अनियन्त्रित भई दुर्घटना भएको जिल्ला प्रहरी कार्यालय पश्चिम नवलपरासीले जनाएको छ । दुर्घटनामा परि १० जना घाइते भएका छन् । उनीहरूमध्ये ४ जनाको अवस्था मध्यम र ६ जनाको अवस्था सामान्य रहेको प्रहरीको भनाई छ ।

घाइतेहरूलाई उपचारका लागि सहिद स्मृति अस्पताल चौपत्ता लगिएको छ । भ्यानमा २५ जना सवार रहेको प्रहरीले बताएको छ ।