ढाका ।
बङ्गलादेशमा आएको भिषण बाढीका कारण २३ जनाको ज्यान गएको अन्तर्राष्ट्रिय समाचार एजेन्सीहरुले जनाएका छन् । बाढीबाट करिब ६० लाख मानिस प्रभावित र हजारौँ परिवार विस्थापित भएका छन् ।
विपद् व्यवस्थापन तथा राहत मन्त्रालयअन्तर्गतको राष्ट्रिय विपद् व्यवस्थापन समन्वय केन्द्र(एनडिआरसिसी) को दैनिक विपद् अवस्था प्रतिवेदनअनुसार सोमबार दिउँसोसम्म देशका ६४ जिल्लामध्ये ११ जिल्लामा बाढीका कारण ५७ लाख एक हजार दुई सय चार जना प्रभावित भएका छन् ।
मन्त्रालयको वेवसाइटमा प्रकाशित प्रतिवेदनमा देशमा बाढीका कारण २३ जनाको ज्यान गएको छ भने ११ जिल्लामा १२ लाख ३८ हजार ४८ परिवार अलपत्र परेका छन् । दुई जना बेपत्ता समेत भएको बताइएको छ ।
गत हप्तादेखि प्रमुख नदीहरू ‘ओभरफ्लो’ हुँदा बङ्गलादेशका केही भागमा जमिनको ठूलो क्षेत्र जलमग्न भएको छ । बाढीले देशको ठूलो भू–भागमा बस्तीहरू, बाली, सडक र राजमार्गहरूमा व्यापक क्षति पुर्याएको बताइएको छ ।
बङ्गलादेशको अन्तरिम सरकारका प्रमुख सल्लाहकार मुहम्मद युनुसले आइतबार सबै सरोकारवालाहरूलाई अलपत्र परेका मानिसहरूलाई उद्धार गर्न, आपत्कालीन स्वास्थ्य सेवा प्रदान गर्न र बाढी पीडितहरूका लागि हरसम्भव सहयोग गर्न आफ्नो बलियो प्रयास जारी राख्न आग्रह गरेका थिए ।
बङ्गलादेशमा आएको बाढीका कारण उत्पन्न भएको महत्त्वपूर्ण चुनौतीको सामना गर्दै बङ्गलादेशस्थित चिनियाँ दूतावासले आइतबार फेनीको सबैभन्दा बढी प्रभावित क्षेत्रमा तयारी खाना, पिउने पानी र जीवनयापनका अत्यावश्यक सामग्री उपलब्ध गराएको छ ।
यसबाहेक चीनको रेडक्रस सोसाइटीले बङ्गलादेश रेड क्रिसेन्ट सोसाइटीलाई आपत्कालीन मानवीय सहायताका लागि एक लाख अमेरिकी डलर सहयोग गरेको छ । साथै यहाँको चिनियाँ दूतावासले प्रमुख सल्लाहकार राहत तथा कल्याणकारी कोषमा २० हजार अमेरिकी डलर सहयोग गर्ने घोषणा गरेको छ ।