पोखरा ।

पश्चिमाञ्चल माविले कास्की जिल्ला अन्तर मावि स्तरीय छात्रा भलिवल प्रतियोगिताको उपाधि जितेको छ।

सोमबार भएको फाइनल खेलमा पोखरा–४, गैह्रपाटनस्थित पश्चिमाञ्चल माविले पोखराकै न्यू ग्यालेक्सी माविलाई सोझो सेटमा पराजित गरेको हो। पश्चिमाञ्चलले २५–९, २५–१४ र २५–२२ को सेटमा न्यू ग्यालेक्सीलाई पराजित गर्दै उपाधि हात पारेको हो ।

पोखरा बहुमुखी क्याम्पसले आयोजना गरेको प्रतियोगितामा उपाधि हात पारेसँगै पश्चिमाञ्चलले नगद ३० हजार रुपैयाँ सहित ट्रफी प्राप्त गरेको छ । क्याम्पसले हरेक वर्ष आयोजना गर्ने प्रतियोगितामा पश्चिमाञ्चलले योसँगै लगातार तेश्रोपटक उपाधि हात जितेर ह्याट्रिक गरेको हो। उपविजेता बनेको न्यू ग्यालेक्सीले नगद २० हजार रुपैयाँ सहित ट्रफी प्राप्त गरेको छ ।

प्रतियोगिताका संयोजक विनोद आचार्यका अनुसार तीनदिनसम्म चलेको प्रतियोगितामा कास्कीका निजी र सामुदायिक गरि २३ विद्यालयले भाग लिएका थिए।
विजयी विद्यालय तथा खेलाडीलाई क्याम्पस संचालक समितिका अध्यक्ष नरेन्द्रमान लालचन, क्याम्पस प्रमुख शिशुकला पराजुली सहितले नगद, प्रमाणपत्र, मेडल तथा शिल्ड प्रदान गरेका थिए।