पोखरा ।
कोड फर चेन्ज पोखरा र पोखरा इन्टरनेट प्रा.ली बीच सहकार्यका लागि साझेदारी गरेका छन्। पोखराका आईटी विद्यार्थीहरूको सीप र उनीहरुलाई अवसर प्रदान गर्नको लागी यी दुई संस्थाबीच साझेदारी भएको हो ।
दुवै संस्थाले अगस्ट ८, २०२४ मा समझदारी पत्र (एमओयू) मा हस्ताक्षर गरेका छन् । यो साझेदारीले विद्यार्थीहरूलाई आवश्यक सीपहरू सिक्न, सञ्जाल निर्माण गर्न, र करियरका लागि तयार हुन सहयोगी वातावरण प्रदान गर्नेछ।
यस साझेदारीले आईटी विद्यार्थीहरूलाई ह्याकाथन, कार्यशाला, र बुटक्याम्पहरूमा सहभागी गराएर उनीहरूको व्यवहारिक सीपहरू विकास गर्ने अवसर उपलब्ध गराउनेछ।
पोखरा इन्टरनेट प्रा.लि ले यी कार्यक्रमहरूमा भरपर्दो इन्टरनेट कनेक्टिविटी प्रदान गर्ने र कोड फर चेन्ज पोखरासँग आबद्ध विद्यार्थीहरूलाई इन्टर्नशिप तथा रोजगारका अवसरहरू उपलब्ध गराउनेछ।
यस साझेदारीले पोखरा क्षेत्रका आईटी विद्यार्थीहरूको शैक्षिक अनुभवलाई सशक्त बनाउने छ । प्रविधि विकास र समुदायको प्रगतिको लागि साझा प्रतिबद्धतालाई पनि उजागर गर्ने आशा लिइएको छ।
दुवै संस्थाहरूले सँगै मिलेर काम गर्ने र पोखरामा आईटी पेशेवरहरूको नयाँ पुस्तालाई तयार गर्ने लक्ष्य राखेका छ । कोड फर चेन्ज पोखराले अघिल्लो वर्षहरूमा ह्याकाथन, कार्यशाला, र तालिमहरू जस्ता विभिन्न कार्यक्रमहरू सफलतापूर्वक सञ्चालन गरिसकेको छ ।
अब पोखरा इन्टरनेट प्रा.लि. को सहकार्यले ती कार्यक्रमहरूलाई अझ व्यापक र प्रभावकारी बनाउने अपेक्षा गरिएको छ। यसले विद्यार्थीहरूको सहभागिता र सिकाइ प्रक्रियालाई सहज बनाउनेछ भने उनीहरूको सीपलाई तिखार्ने र उद्योगमा उनीहरूको उपस्थिति बलियो बनाउने पोखरा इन्टरनेट प्रा.लि.ले जनायो।
इन्टरनेटको सहज पहुँच र प्राविधिक सहयोगका साथ, विद्यार्थीहरूले व्यावहारिक सीपहरू विकास गर्न र सैद्धान्तिक ज्ञानलाई कार्यान्वयनमा ल्याउन अझ राम्रो अवसर पाउने पोखरा इन्टरनेटको दाबी छ ।
