काठमाडौं ।
काभा वुमन्स नेसन्स लिग अन्तर्गत नेपालले आज इरानसंग सेमिफाइनल खोल खेल्दैछ । सोमबार भारतले श्रीलंकालाई सोझो सेटमा पराजित गरेपछि नेपालले सेमिफाइनलमा इरान प्रतिद्वन्द्वी पाएको हो ।
सोमबार नै नेपालले माल्दिभ्सलाई सोझो सेटमा हराए पनि शीर्ष स्थानमा रहन सकेन । फाइनल प्रवेशका लागि भारतले श्रीलंकासँग र नेपालले इरानसंग खेल्ने भएका हुन् ।
आइतबार लिग चरणमा ३–२ को सेटमा हार ब्यहोरेको नेपालले आफ्नो गल्ती सुधार गर्दै सेमिफाइनलमा इरानलाई जित्ने योजना बनाएको छ । इरानको टिमबारे यसअघि जानकारी नभएकाले आइतबारको खेलमा पराजित भएको प्रशिक्षक जगदिश भट्टले बताए ।
सेमिफाइनलमा इरानसँगको खेलमा अघिल्लो खेलको गल्ती नदोहोर्याउने कप्तान अरुणा शाही बताउँछिन् । इरानसँगको खेलमा रिसिभ र डिफेन्स कमजोर देखिएकाले सुधार गर्नुपर्ने कप्तान शाहीको भनाई छ ।
