काठमाडौँ ।

ठमेलस्थित एक होटलबाट २० करोड रुपैयाँभन्दा बढीको कोकिन बरामद भएको छ । प्रहरीले ५ किलो ८२० ग्राम कोकिन बरामद भएको बताएको छ । सो कोकिनको बजार मूल्य २० करोड ३६ लाख रुपैयाँ हुन आउने प्रहरीको भनाई छ ।

बरामद कोकिनसहित एक विदेशी महिला पक्राउ परेकी छन् । पक्राउ पर्नेमा मलेसियाकी ४७ वर्षीया बाथुमालाई भाडिभालु रहेकी छन् ।उनलाई काठमाडौँ सिटी होटलबाट नियन्त्रणमा लिइएको हो ।

होटलमा लागु औषधको कारोबार भइरहेको छ भन्ने विशेष सूचनाको आधारमा जिल्ला प्रहरी परिसर काठमाडौँ र प्रहरी वृत्त लैनचौरको संयुक्त टोलीले उनलाई पक्राउ गरेको जानकारी दिइएको छ ।

कोठाको खान तलासी गर्दा ६ वटा स्कुल ब्यागमा फल्स बटम बनाएर कोकिन लुकाएको भेटिएको थियो ।