पोखरा ।

पोखराको बाटुलेचौरमा रहेका जेष्ठ नागरिक सम्मानित भएका छन् । मैदान टोल विकास संस्थाले शनिबार एक कार्यक्रमका बीच टोल भित्रका ८० बर्ष माथिका ९ जना जेष्ठ नागरिकलाई सम्मान गरेको हो ।

साहित्यकार नरहरि भट्टराई, चोक वहादुर थापा, बालकुमारी श्रेष्ठ, टुल्की श्रेष्ठ, गणेश वहादुर वस्नेत, तिलकुमारी श्रेष्ठ,गोमा वस्नेत, स्यानी श्रेष्ठ र खड्क कुमारी थापालाई कार्यक्रमका प्रमुख अतिथि हिमालय क्लबका अध्यक्ष सुशील बस्नेत, सल्लाहकार कुमार श्रेष्ठ, बल वहादुर थापा, शिवराज देवकोटा, कालिका मन्दिरका पुजारी नारायण प्रसाद देवकोटा लगायतकाले सम्मान पत्र सहित सल ओढाएर सम्मान गरे । क्लबका अध्यक्ष बस्नेतले जेष्ठ नागरिक समाजका दर्पण भएको बताउँदै, उनीहरूको सम्मान र सेवा गर्नु समाजको दायित्व भएको बताए ।

संस्थाका अध्यक्ष मोहन वहादुर थापाको अध्यक्षतामा भएको कार्यक्रममा सम्मानित जेष्ठ नागरिक साहित्यकार नरहरि शर्मा भट्टराई, क्लबका पूर्वअध्यक्ष जिव नारायण श्रेष्ठ, अमला बिसौनी धोविनी पाटन टोल विकास संस्थाका अध्यक्ष खगेन्द्र थापा, सचिव मनु बस्नेत लगायतले संस्थाले गरेको कार्य अनुकरणीय रहेको बताए ।

संस्थाका अध्यक्ष थापाले जेष्ठ नागरिक प्रतिको सम्मानलाई निरन्तरता दिँईने प्रतिवद्धता जनाए। कार्यक्रमको संचालन सचिव मनु बस्नेतले गरेकी थिइन् ।