पोखरा ।
नेपालले दोस्रो तथा अन्तिम अभ्यास खेलमा ह्युस्टन हरिकेन्सलाई २७ रनले हराएको छ । १२४ रनको लक्ष्य पछ्याएको ह्युस्टन हरिकेन्स १८.३ ओभरमा ९६ रनमा अल आउट भयो ।
जिआ शाहजादले २९ बलमा १ चौका र २ छक्कासहित सर्वाधिक ३५ रन बनाए । इमरान खान जुनियर र लाहिरु मिलान्था १६र१६ रनमा आउट भए । अन्य कुनै पनि ब्याटरले राम्रो प्रदर्शन गर्न सकेनन् ।
नेपालका करण केसीले ३ ओभरमा १० रन खर्चेर ३ विकेट लिए । सोमपाल कामीले ४ ओभरमा १७ रन खर्चेर २ विकेट लिए । रोहित पौडेल, अभिनाश बोहरा र सागर ढकालले एकरएक विकेट लिए ।
त्यसअघि प्रेरी भ्यू कम्प्लेक्स ह्युस्टनमा टस जितेर पहिला ब्याटिङ रोजेको नेपालले २० ओभरमा ६ विकेट गुमाउँदै १२३ रन बनाउन सकेको थियो । कप्तान रोहित पौडेलले ४० बलमा १ चौकासहित सर्वाधिक ३७ रन बनाएका थिए । ओपनर कुशल भुर्तेल ३१ बलमा २ चौकासहित २३ रन जोडे । नेपालका कुनै पनि ब्याटरले क्रिजमा जमेर राम्रो प्रदर्शन गर्न सकेनन् ।
तीव्र गतिका बलर इमरान शेखको बलमा ओपनर आसिफ शेख कभरमा अली शेखबाट एक रनमा समातिन पुगेका थिए । कोर्ने ड्राइको बलमा अनिल साह ४ रनमा एज लागेर विकेटकिपर लाहिरु मिलान्थाबाट क्याच आउट भए ।
कुशल भुर्तेल जिआ शाहजादको बलमा कट एण्ड बोल्ड हुन पुगे । कुशल मल्ल जिआको बलमा लङअफमा ६ रनमा अलीबाट क्याच भएका थिए । त्यसपछि गुलशन झा १४ रनमा आउट भए । उस्मान शिनवारीको योर्कर बलमा रोहित बोल्ड भएका थिए । सन्दीप जोरा र सोमपाल कामी १२/१२ रन बनाए ।
ह्युस्टनका इमरान शेख जुनियरले ४ ओभरमा २३ रन खर्चेर २ विकेट लिए । जिआ शाहजादले ४ ओभरमा २३ रन खर्चेर २ विकेट लिए । कोरी ड्राई र उस्मान शिनवारीले एकरएक विकेट लिए ।
पहिलो खेलमा नेपाल ६ रनले विजयी भएको थियो । योसँगै नेपालले दुई खेलको सिरिज क्लिनस्वीप पनि गरेको छ । नेपालले आव २७ मे मा क्यानडा र ३० मे मा अमेरिकासँग आईसीसी टी–२० विश्वकप वार्मअप खेल खेल्नेछ । त्यसपछि विश्वकप सुरु हुनेछ ।
विश्वकप १ जुनदेखि २९ सम्म अमेरिका र वेष्टइण्डिजमा हुनेछ । नेपालले ४ जुनमा डालासमा नेदरल्यान्ड्ससँग खेल्दै विश्वकपको सुरुवात गर्नेछ ।
