काठमाडौं । नेपालले मलेसियामा जारी एसीसी वुमन्स प्रिमियर कप क्रिकेटको क्वाटरफाइनल खेलमा कुवेतविरुद्ध फिल्डिङ गरिरहेको छ ।
कुवेतले टस जितेर ब्याटिङ गर्ने निर्णय गरेपछि नेपालले फिल्डिङ गरेको हो । यो खेल जित्न सफल भएमा नेपाल सेमिफाइनल पुग्नेछ ।
नेपाल समूह डीको विजेता बनेर क्वाटरफइनलमा पुगेको हो भने कुवेत समूह ए को उपविजेताको रुपमा क्वाटरफाइनलमा पुगेको हो ।
नेपालले समूह चरणमा हङकङ र भुटानलाई समान ८ विकेटले हराएको थियो । माल्दिभ्सलाई भने २१४ रनले हराएको थियो ।
उता कुवेतले समूह चरणमा म्यानमारलाई २७ रन र सिंगापुरलाई १० विकेटले हराएको थियो । थाइल्यान्डसँग ९६ रनले पराजित भएको थियो ।
२०१९ यता नेपाल र कुवेतबीच चार महिला टी–२० आई खेल भइसकेका छन् । जसमा नेपाल ३४ रन, २५ रन, ९ विकेट र ३० रनले विजयी भएको थियो ।
