पोखरा ।
कास्कीको माछापुच्छ्रे गाउँपालिका खेलकुद विकास समितिको आयोजनामा दोस्रो माछापुच्छ्रे गाउँपालिका अध्यक्षकप गण्डकी प्रदेश अन्तर पालिका स्तरीय पुरुष भलिबल प्रतियोगिता २०८० हुने भएको छ ।
आगामी पुस २६ गतेदेखि २८ गतेसम्म दुई प्रतियोगिता चल्ने आज आज पत्रकार सम्मेलन मार्फत गाउँपालिकाकी उपाध्यक्ष सीता अधिकारीले जानकारी दिइन् ।प्रतियोगिता माछापुच्छ्रे गाउँपालिका वडा नम्बर ३ घाचोकमा संचालन हुने आयोजकले जानकारी दिएको छ ।
प्रतियोगितामा प्रथम हुनेलाई ३ लाख, द्धितिय हुनेलाई २ लाख र समीफाइनलमा उपविजेता बन्ने २ टिमलाई ५०/५० हजार रुपैयाँ, ट्रफी मेडल र प्रमाणपत्र प्रदान गरिने आयोजकले जनाएको छ ।
साथै प्रतियोगितामा विधागत रुपमा उत्कृष्ट खेलाडीलाई ७ हजार, उत्कृष्ट स्पाइकर, मिडल ब्लकर, डिफेन्डर, सेटर, सर्भर र प्रशिक्षकलाई ५ हजारका दरले पुरस्कार प्रदान गर्ने आयोजकले बताएको छ ।
प्रतियोगिता सञ्चालन गर्नको लागि करिब १२ लाख ८३ हजार रुपैयाँ खर्च हुने आयोजकको अनुमान छ ।भलिबल खेलको अतिरिक्त साँस्कृतिक लगायत मनोरञ्जनात्मक कार्यक्रम समेत हुने भएको छ ।
प्रतियोगिता माछापुच्छ्रे गाउँपालिका कार्यालयको मुख्य सहयोग र वडा नम्बर ३ कार्यालयको समन्वय तथा माछापुच्छ्रे गाउँपालिका भलिवल संघको व्यवस्थापनमा सञ्चालन हुने भएको हो ।
