काठमाडौं ।
यू-१९ एसिया कपमा नेपालले समूह चरणमै कठिन प्रतिद्वन्द्वीको सामना गर्ने भएको छ ।
एसियन क्रिकेट काउन्सीलले आज सार्वजनिक गरेको खेल तालिकाअनुसार नेपालले क्रिकेटका दुई महाशक्ति भारत र पाकिस्तानसँग भिड्नुपर्ने भएको हो ।
एसिया कपको आगामी संस्करण यूएईमा आउँदो ८ डिसेम्बरबाट सुरु हुँदै छ । नेपाल समूह ‘ए’ मा परेको छ, जहाँ भारत, पाकिस्तान र अफगानिस्तानसमेत छन् । समूह ‘बी’ मा बंगलादेश, श्रीलंका, यूएई र जापान छन् ।
नेपालले पहिलो खेल पाकिस्तानसँग ८ डिसेम्बरमै खेल्ने छ । दुबईको आईसीसी एकेडेमी ओभलमा उक्त खेल स्थानीय समयअनुसार बिहान ९ः३० मा सुरु हुने जनाइएको छ ।
यस्तै, दोस्रो खेल नेपालले अफगानिस्तानसँग १० डिसेम्बरमा सोही मैदानमा खेल्ने छ । यसै गरी, तेस्रो तथा समूह चरणको अन्तिम खेल १२ डिसेम्बरमा नेपालले भारतसँग खेल्नेछ ।
प्रत्येक समूहबाट शीर्ष दुई टीम सेमिफाइनलमा प्रवेश गर्नेछन् । दुवै सेमिफाइनल १५ डिसेम्बरमा दुई अन्तर्राष्ट्रिय रंगशालामा आयोजना हुने भएको छ ।
हालै भएको छनोट प्रतियोगिताबाट नेपालको यू१९ टिमले एसिया कपमा स्थान बनाएको थियो ।
