पोखरा ।
पोखरामा ‘दोस्रो राष्ट्रिय खुल्ला फुटसल प्रतियोगिता’ आयोजना हुने भएको छ । राजन एण्ड द ब्रदर्शले नेपालकै सर्वाधिक राशीको फुटसल प्रतियोगिता गर्न लागेको हो । आइतबार पोखरामा पत्रकार सम्मेलन गरेर आयोजकले प्रतियोगिता वारे जानकारी दिएको हो ।

आयोजक संस्थाका अध्यक्ष राजन गुरुङले प्रतियोगिता आगामी असोज २७ गतेदेखि ३० गतेसम्म पोखरा रंगशालास्थित कभर्ड हलमा सञ्चालन हुने जानकारी दिए । प्रतियोगितामा ३० भन्दा बढी टिमको सहभागिता रहने छ ।

यस वर्ष पुरस्कार राशी वृद्धि गरेर ५ लाख पुर्याइएको आयोजकले जनाएको छ । प्रतियोगिताका संयोजक आशिष क्षेत्रीले पहिलो संस्करणको उपाधि राशी ३ लाख बढाएर ५ लाख पुर्याइएको जानकारी दिए । विजेताले ५ लाख, उपविजेताले ३ लाख रुपैयाँ साथै शिल्ड, मेडल तथा प्रमाणपत्र प्राप्त गर्नेछन् ।

प्रतियोगितामा ५ विधामा खेलाडीलाई पुरस्कृत गरिने छ । सर्वोत्कृष्ट खेलाडीले ५० हजार प्राप्त गर्नेछ भने उत्कृष्ट गोलरक्षक, सर्वाधिक गोलकर्ता र उदीयमान खेलाडीले २५/ २५ हजार रुपैयाँ पाउने क्षेत्रीले बताए ।