पोखरा ।
कालीगण्डकी गाउँपालिकाका अध्यक्ष खीम थापाले आफ्नो पालीकाले योजनावद्ध रुपमा विकास पूर्वाधार निर्माण गरेर देशमै उदाहरणीय बन्ने बाटोमा अगाडि बढेको बताएका छन् । नेपाल पत्रकार महासंघ गण्डकी प्रदेश समितिले आयोजना गरेको ‘कालीगण्डकी गाउँपालिका पर्यटकीय सम्भावना र विकास पूर्वाधार विषयक अन्तरक्रिया तथा सूचना तथा सञ्चार प्रविधि सम्बन्धी अभिमुखीकरण’ कार्यक्रमलाई बुधरबार मिर्मिमा सम्बोधन गर्दै उनले यस्तो बताएका हुन् । उनले पालिकामा धेरै नै विकास भएपनि प्रचार भने नभएको धारणा राखे ।

अध्यक्ष थापाले आफ्नो पालिकामा पहिलो पाँच वर्षमा सात अर्व रुपैयाँ खर्च गर्ने योजना बनाएकोमा कोभिड लगायतका कारणले साढे ५ अर्व रुपैयाँ बराबर खर्च भएको जानकारी दिए । उनका अनुसार अघिल्लो ५ वर्षमा ५० किलोमिटर बाटो पीच गर्ने घोषणा गरिएकोमा २२ किलोमिटर पीच गरिएको बताए । यो आर्थिक वर्षभित्र ४२ किलोमिटर पीच भइसक्ने उनले जानकारी दिए । पालिकाको वडा नम्बर २ बाहेक सबै वडा कार्यालयसम्म पीच बाटोले जोडिएको र वडा नम्बर २को कार्यालयमा पनि यो आर्थिक वर्ष भित्र पीच बाटो पुर्याउने उनको घोषणा छ ।

शिक्षा, स्वास्थ्य र पूर्वाधारको विषयमा पालिकाले महत्वपूर्ण प्रगती गरेको उनले दाबी गरे । पालिका भित्र रहेका धार्मिक पर्यटकीय पूर्वाधारको विकास र उचित प्रचार प्रसारमा पालिकाले ध्यान दिएको उनले बताए । पालिका आफैले २४ रोपनीमा ड्रागन फूड्स लगाएर कृषकलाई प्रोत्साहन गरिएको, पालिकामा जन्मेका सबैलाई निसुल्क स्वास्थ्य विमा लागु गरिएको र पालिकालाई ग्यास चुल्हो मुक्त बनाउने योजनामा आफूहरु रहेको उनले बताए । उनका अनुसार पालिकामामा सामुदायिक विद्यालयमा विद्यार्थीको आकर्षण बढेको र निजी विद्यालय घट्दै गएको बताए ।

कालीगण्डकीमा हाल ३९ विद्यालय मध्ये ३५ वटा सामुदायिक र चार वटा मात्र संस्थागत विद्यालय छन् । गाउँपालिकाका उपाध्यक्ष सावित्रा कोइरालाले पालिकामा सबै काम विवाद रहितढंगले हुनेगरेको जानकारी दिइन् । उनले दुर्गम भनिएको पालिकामा पत्रकार महासंघ गण्डकी प्रदेशले कार्यक्रमको आयोजना गरेकोमा धन्यवाद दिइन् । पालिकाका प्रमुख प्रशासकीय अधिकृत देवेन्द्र पाण्डेले पालिकाको पर्यटकीय र पूर्वाधार विकासका विषयमा प्रस्तुतिकरण राखेका थिए ।

उक्त अवसरमा नेपाल पत्रकार महासंघ गण्डकीले निर्माण गरेर महासंघ जिल्ला शाखा स्याङ्जालाई वेवसाइट हस्तान्तरण गरेको छ । पोखरा महानगरको सहयोगमा महासंघ गण्डकी प्रदेश समिति अन्तर्गत सूचना तथा प्रविधि उपसमितिले वेवसाइट डिजाइन गरेर महासंघ स्याङ्जालाई हस्तान्तरण गरेको हो ।

नेपाल पत्रकार महासंघ स्याङ्जाको समन्वय र कालीगण्डकी गाउँपालिकाको सहयोगमा भएको सो कार्यक्रममा पत्रकार महासंघ गण्डकी प्रदेश समिति अध्यक्ष नारायण शर्मा, महासंघ स्याङ्जाका कार्यबहाक अध्यक्ष राधाकृष्ण डुम्रे र सचिव प्रतीक्षा काफ्ले लगायतले उक्त अवसरमा बोलेका थिए ।