काठमाडौं ।
पछिल्लो समय चर्चा कमाएका लोक गायक प्रकाश दूतराजले आत्महत्याको प्रयास गरेको भन्ने खबर सार्वजनिक भएको छ ।
सांगीतिक कार्यक्रमका लागि अष्ट्रेलिया गएका गायक प्रकाशले स्थानीय समयअनुसार हिजो राति २ बजे झुण्डिने प्रयास गरेको स्रोतले बताएको भन्दै राष्ट्रिय अनलाईन न्युजपोर्टलहरुले समाचार प्रकाशन गरेका छन् ।
गायिका भूमिका त्रिपाठीसहित दूतराज कन्सर्टका लागि गत २० अक्टोबरमा अष्ट्रेलिया गएको बताइएको छ । आयोजकले एउटा फ्ल्याट लिएर उनीहरुलाई राखेकोमा सोही फ्ल्याटको आफू सुत्ने कोठामा दूतराजले झुण्डिने प्रयास गरेका हुन् ।
उनको कोठाको ढोका खुल्लै भएकाले झुण्डिने प्रयासका क्रममा भूमिकाले थाहा पाएपछि उनको कोठामा प्रवेश गरी उद्धार गरेको आयोजक निकट स्रोतले बतायो ।
दूतराजको अवस्था अहिले सामान्य छ । उनले आत्महत्या प्रयास गर्नुको कारण खुलाएका छैनन् । दूतराज र भूमिका अहिले केही दिनपछि अष्ट्रेलियाबाट फर्किने बताइएको छ ।
प्रकाशले गाएका ‘घर कता हो बैनीको‘’ ‘जाम भो माइली‘’ ‘चोली मैलै भो‘’, ‘रेलिमाई‘’ लगायत गीतहरू चर्चित छन् ।
