बर्दिया ।
भारतीय जंगलमा निहुरो टिप्न गएका नेपालीमाथि गोली प्रहार भएको छ । गोली लागी एक जनाको ज्यान गएको प्रहरीले जनाएको छ ।
बर्दियासँग जोडिएको भारतीय सिमाना मुर्तीहाको घना जंगलमा निहुरो टिप्न गएका गुलरिया नगरपालिका-३ का ५४ वर्षीय हेमराज गोडियामाथि गोली प्रहार भएको हो ।उनी हिजो(बिहीबार)बेलुकी निहुरो टिप्न गएका थिए ।
गोली लागेर भाग्दै घर नजिक पुगेका घाइते गोडिया केहीबेर पछि बेहोस भएका थिए । उनी होसमा आएपछि घरमा फोन गरी आफन्तीलाई बोलाएका थिए ।
राति नै उनलाई एम्बुलेन्समा उपचारका लागि गुलरिया अस्पताल पुर्याइएकोमा अत्याधिक रगत बगेका कारण उनको मृत्यु भएको प्रहरीले जनाएको छ । उनलाई कसले गोली हानेको हो अनुसन्धान भइरहेको बताइएको छ ।
स्रोतका अनुसार भारतीय वन रक्षकले गोली प्रहार गरेको आशंका गरिएको छ ।
