काठमाडौं ।

आफ्नै कलेजका सेक्युरिटी गार्डलाई खुकुरी हान्ने ४ विद्यार्थी पक्राउ परेका छन् ।

काठमाडौंको कालिकास्थान स्थित ट्रिनिटी कलेजमा कार्यरत सुरक्षा गार्डमाथि हिजो दिउँसो साढे १ बजेतिर विद्यार्थीले खुकुरी प्रहार गरेका थिए । यो घटनाको अनुसन्धानका लागि प्रहरीले चार जना विद्यार्थीलाई नियन्त्रणमा लिएको छ ।

प्रकाउ पर्नेमा म्याग्दीको बेनी नगरपालिका घर भई हाल काठमाडौंको बानियाटार बस्ने जोसेन बानियाँ, रामेछापको मन्थली घर भई हाल काठमाडौंको डिल्लीबजार बस्ने विपिन खत्री, ओखलढुंगाको मानेभञ्ज्याङ–६ घर भई हाल काठमाडौं घट्टेकुलो बस्ने प्रतिक खतिवडा र काठमाडौं टोखा–६ का सञ्जिव भण्डारी रहेको प्रहरीले जनाएको छ।

उनीहरु मानविकी संकायमा कक्षा ११ मा अध्ययनरत विद्यार्थीहरु रहेको प्रहरीले जनाएको छ।

गार्डको खुकुरी प्रहारबाट बायाँ कान मुनि चोट लागेको बताइएको छ । ती सुरक्षा गार्ड उपचारपछि डिस्चार्ज भएको र उनको अवस्था सुधारोन्मुख रहेको प्रहरीले जनाएको छ ।

घटनाको अनुसन्धान गर्ने क्रममा उक्त घटनामा संलग्न सोही कलेजका चार जना विद्यार्थीहरुलाई प्रहरीले नियन्त्रणमा लिएको छ ।