विराटनगर।
नेकपा एमालेका अध्यक्ष केपी शर्मा ओलीले प्रधानन्यायाधीश चोलेन्द्र शमशेर जबराको राजीनामा देखि महाभियोग लगाउने सम्मको प्रयासहरुको आलोचना गरेका छन् । उनले त्यसमा आफूहरु नअल्झने स्पष्ट पारेका छन् । उनले अदालतमा अहिले विकसित घटनालाइ राजनीतिक दाउपेच र अशोभनीय गुटबन्दीको संज्ञा दिदै खिचातानीमा नपर्ने बताए ।
‘हामीलाई अदालतको राजनीतिक दाउपेच, अशोभनीय गुटबन्दी र खिचातानीमा पर्नु छैन,’ ओलीले प्रेस चौतारी मोरङले आज आयोजना गरेको कार्यक्रममा भने, ‘न्यायाधीशलाई न्यायाधीशको आसनमा बसेर न्याय निरुपण गर्न त अदालतको श्रीमान्ज्यूहरुले नै नदिएको होइन र ?’
ओलीले धम्कीको भरमा इजलासका सदस्यहरु फेर्ने र न्यायाधीश मान्दिनँ भन्ने गतिविधिहरु भएको भन्दै आक्रोश पोखे । उनले भने, ‘यी तमासा परमादेशभन्दा अगाडिकै सेटिङ होइन र ?’ ओलीले सुशीला कार्कीलगायत प्रधानन्यायाधीश चोलेन्द्र शमशेर जबराको राजीनामा माग्ने पूर्वप्रधानन्यायाधीशहरुको खुलेर आलोचना गरे ।
उनले भने, ‘संविधानको बर्खिलाम सुशीला कार्कीले उहिले नै फैसला गर्नुभयो ।’ उनले संवैधानिक इजलास गठनबारे संविधानमा उल्लेख भए अनुसार हुनुपर्नेमा धम्की दिने गतिविधिहरु भएको भन्दै आफूहरुले खबरदारी गर्दै आएको बताए ।
अहिले सत्ता गठबन्धनबाट राज्यको सिस्टम नै भताभुंग पार्ने खेलहरु भइरहेको आरोप लगाए । ओलीले भने, ‘एमाले राज्यको सिस्टम कमजोर पार्ने गतिविधिलाई असफल पारेरै छाड्छ ।’
