एजेन्सी ।
सामाजिक सञ्जालमा समयसमयमा रोचक कुराहरुले तहल्का मच्चाइरहेको हुन्छ ।
अनौठा प्रकृतिका घटना, तस्विर वा भिडियोले सामाजिक सञ्जाल तातिरहेको हुन्छ । यतिबेला सामाजिक सञ्जालमा भारतीय जोडीको तस्वीर भाइरल भएको छ ।
भारतमा वर र वधू खड्कुँलोमा बसेर जलमग्न सडकबाट विवाह गर्न गएको तस्बिर भाइरल भएको हो।यो तस्बिर ठूलो वर्षाका कारण नराम्ररी प्रभावित भएको केरला राज्यको थालावाद्यमा सोमवार खिचिएको हो।
वर्षा र बाढीले दुःख दिएको भए पनि आकाश र ऐश्वर्या तोकिएकै मितिमा विवाह गर्न कटिबद्ध थिए। उनीहरू दुवै जना स्वास्थ्यकर्मी हुन्।
खड्कुँलोलाई डुङ्गा बनाएर उनीहरू विवाह गर्न मन्दिरसम्म पुगेका थिए।केरला राज्य अहिले बाढी र पहिरोले आक्रान्त बनेको छ। त्यहाँ धनजनको ठूलो क्षति पुगेको छ।
वर्षाका कारण नदीहरूमा पानीको तह बढेको छ। धेरै ठाउँमा पानीले पुल र सडक बगाएको छ भने कतिपय गाउँहरू पूर्ण रूपमा यातायात सञ्जालबाट विच्छेद भएका छन्।
आकाश र ऐश्वर्याको विवाह हुने मन्दिर पनि केही डुबेको थियो।उनीहरूलाई नातेदारले नजिकैको अर्को मन्दिरबाट सापट लिएको खड्कुँलोमा राखेर विवाहस्थलसम्म तानेर पुर्याएका थिए।
हामीले कहिल्यै नसोचेको विवाह भयो,ऐश्वर्याले एक स्थानीय टिभीसँग बताएकी छिन् ।
नवविवाहित दम्पतीले आफ्नो विवाह दुई परिवारको सानो समारोह भए पनि अनलाइनमा तस्बिरहरू शेयर भएपछि आफ्नो विशेष दिनमा धेरै मानिस सहभागी भएको अनुभूति भएको बताएका छन्।
आकाशले आफ्नो विवाहको मिति अलि पहिले निश्चित गरिएको र थप बिदा लिन असहज हुने भएकोले सार्न नचाहेको बताएका छन्।उनले हतारमा खड्कुँलो मात्रै उपलब्ध भएको बताए। स्रोत: बीबीसी नेपाली
