काठमाडौं ।
नेपालले सबै मुलुकका नागरिकलाई पुन स्वागत गर्न ढोका खोलेको छ ।
सरकारले झन्डै १७ महिनापछि विदेशी पर्यटकलाई नेपालको ढोका खुला गरेको हो । अब सबै देशका नागरिक तथा पर्यटकलाई अनअराइभल भिसा दिने पर्यटन मन्त्रालयले जनाएको छ ।कोरोना भाइरसको त्राससँगै २०७६ फागुनदेखि पर्यटक भिसा बन्द थियो।
मन्त्रालयले यात्रा व्यवस्थापनसम्बन्धी आदेश जारी गरेको आदेशमा पूरा डोज खोप लगाएकाहरूले क्वारेन्टाइन बस्नु नपर्ने व्यवस्था गरेको उल्लेख गरेको छ। व्यवसायीले खोपको मात्रा पूरा गरेकाहरूका हकमा क्वारेन्टाइनको व्यवस्था हटाउन माग गर्दै आएका थिए। खोपको मात्रा पूरा गरेको १४ दिन कटेको प्रमाण र हवाई उडानको चेकइन हुनुभन्दा ७२ घण्टाभित्रको पीसीआर परीक्षणको रिपोर्ट भने अनिवार्य गरिएको छ।
यी प्रक्रिया पूरा गरी आउनेलाई आगमन बिन्दुमा नै अनअराइभल भिसा दिइने मन्त्रालयले जनाएको छ। खोप नलगाएकाहरू भने आफ्नै खर्चमा १० दिन होटल क्वारेन्टाइन बस्नुपर्नेछ। ११ औं दिनमा कोभिड परीक्षणपछि नेगेटिभ आए गन्तव्यमा जान पाउने छन्। पर्वतारोहण र पदयात्रा तथा अनुमति लिनुपर्ने अन्य विषयको हकमा सोसम्बन्धी अनुमतिसमेत देखाउनुपर्नेछ।
पर्यटकले नेपालमा होटल बुक गरेको प्रमाणसमेत साथमा बोक्नुपर्नेछ। सम्बन्धित नियोगबाटै भिसा लिन चाहने पर्यटकले पनि माथिका सर्त नै पालना गर्नुपर्नेछ।
खोपको डोज पूरा नगरेकाले भने सम्बन्धित मुलुकमा रहेको नेपाली नियोगबाटै भिसा लिनुपर्नेछ। उनीहरूलाई एजेन्सीमार्फत मात्र नेपाल भ्रमणका लागि अनुमति दिइने मन्त्रालयले जनाएको छ।
मन्त्रालयका अनुसार सबै विदेशी नागरिकको अध्यागमन प्रवेश बिन्दुमा एन्टिजेन परीक्षण गरिनेछ। स्वास्थ्य तथा जनसंख्या मन्त्रालयसँगको सहकार्यमा त्रिभुवन अन्तर्राष्ट्रिय विमानस्थलनमा परीक्षणको व्यवस्था मिलाइने भएको छ । अनअराइभल भिसा दिने निर्यायसँगै आगामी सिजनमा पर्यटकको संख्या बढ्ने सरकारको अनुमान छ।
